Heimanám í grunnskólum

Í fréttum rúv í gær var frétt frá Bretlandi þar sem kennarasamtökin þar í landi leggja til að heimanám verði aflagt. Álagið í skólunum sé nógu mikið og ekki á það bætandi með heimanámi.

Þetta leiðir hugann hingað heim. Skiptar skoðanir eru um heimanám og held ég að kominn sé tími til að ræða þetta opinskátt og velta upp kostum og göllum. (Þetta heitir að setja málið á dagskrá). Í fréttinni í gær var talað um heimanám sem krefðist mikillar þátttöku foreldra sem gerðu jafnvel verkefnin. Ég veit ekki hvers eðlis þessi verkefni eru en sú heimavinna sem ég set fyrir er fyrst og fremst lestur í kennslubók í efna og eðlisfræði og reikna nokkur dæmi í stærðfræði (ég kenni 8.-10. bekk). Ef nemendur lesa ekki heima í kennslubókinni þá þurfa þeir væntanlega að gera það í skólanum. Mér þætti fróðlegt að vita hvort t.d. nemandi í 10. bekk í eðlisfræði myndi frekar vilja að lengja skóladaginn um eina kennslustund til að lesa í bókinni með bekkjarfélögunum eða lesa það við tækifæri heima.

Svo á ég dóttur í sex ára bekk sem er að læra að lesa og les þ.a.l. fyrir mig heima. Skólinn leggur mikla áherslu á að börnin lesi fyrir foreldra sína og ég vildi ekki fyrir nokkur mun sleppa því að dóttir mín læsi fyrir mig. Ég sé ekki að þessum hluta heimanáms sé hægt að sleppa.

Annars hef ég lengi verið þeirra skoðunar að stokka ætti kennsluna á unglingastigi alveg uppá nýtt. Vera með hreinar "innlagnir" milli kl. 8 og 11 í kennlugreinunum og nemendur ynnu síðan verkefni og annað út frá þeim í skólanum undir leiðsögn kennara. Með þessu móti yrði engin heimavinna og það væri hvatning fyrir nemanda að vinna vel og nýta tímann í skólanum.

Athugasemdir

[Rósa Harðardóttir, 23.3.2008 kl. 13:32]

Ég er ekki sammála þeim þarna í Bretlandi og tel að með þessu móti séum við að taka ábyrgðina frá foreldrum.  Þeir bera þá skyldu að gera nemendur móttækileg fyrir þeirri menntun sem skólinn annast.  Til þess að eiga auðveldara með að sinna þessum skyldum þurfum við að fara ýmsar leiðir.  Bjóða til kynningafunda, hafa hæfilegt magn af heimanámi sem foreldrar ráða við að aðstoða með (ef það er vandamál), bjóða foreldrum að taka þátt í skólastarfinu, bæði þessu daglega og stefnumótun og síðast en ekki síst að bjóða foreldra ávallt velkomna í skólann.  Mikilvægt er að traust samstarf sé milli heimila og skólans þá verður heimanámið leikur einn er það ekki.

Gleðilega páska 

[Gísli Baldvinsson (IP-tala skráð) 23.3.2008 kl. 14:49]

Þrýstingurinn á afnámh heimanáms kemur frá foreldrum. Ástæðan er augljós: Foreldrar hafa æ minni tíma í samveru barna sinna á þeim tímum sem hentugast er að heimanám fari fram. Ástæðan er ekki einungis langur vinnutími foreldra heldur tómstundaiðkun barnanna. Það gefst hreinlega ekki tími til að lesa saman fyrr en komið er að háttatíma. Annað atriði er að bæði er námsefnið orðið sértækara og viðameira fyrir nemanda t.d. á miðstigi. Margir foreldrar hafa hreinlega ekki þekkingu til að leiðbeina barninu. Heimanám byggir á tveimur stoðum: 1. Uprifjun á innleggi þekkingu sem æfð  hefur verið. Upprifjun dregur úr falli gleymskukúrfunnar um allt að 30%. Endurtekin uprifjun tryggir all að 85% minnisgeymslu. Þá skiptir miklu við hvaða aðstæður (þreyta-næði) er til staðar. 2. Hin stoðin er undirbúningur næstu kennslustundar. Vandaður undirbúningur eykur þekkingu og hæfni allt að 50%.

Við stöndum sem sagt frammi fyrir faglegum ástæðum fyrir heimanámi. Ekki er hægt að hefja heimanám fyrr en eftir 1-2 klst. þar sem þekkingin þarf að "meltast" og heilinn þarf hvíld fyrir áreitinu.

Við stöndum frammi fyrir því að foreldrar finna skömm sína þar ef nemandinn er einfaldlega ekki sjálfbjarga í námi.

Allt þetta kostar peninga en heppilegasta úrræðið er heimanámsstuðningur fyrir tilvísaða nemendur t.d.milli kl 15-17 á daginn, í skólanum.